श्रीमतीसँग सम्बन्ध विच्छेदपछि स्वतन्त्रताको अनौठो उत्सव

साउन ५ गते -भारतको आसाम राज्यको नलबारी जिल्लामा हालै एक अनौठो र चर्चा योग्य घटना घट्यो, जसले सामाजिक सञ्जालमा तहल्का मच्चाएको छ। यहाँका एक स्थानीय पुरुष मानिक अलीले श्रीमतीसँग सम्बन्ध विच्छेद भएपछि ४० लिटर दूधले नुहाएर स्वतन्त्रता मनाएका छन्।

मानिक अलीले आफ्नी श्रीमतीसँग वैवाहिक सम्बन्ध अन्त्य भएकोमा अत्यधिक खुसी व्यक्त गर्दै, सार्वजनिकरूपमा दूध नुहाउने दृश्य सामाजिक सञ्जालमा सेयर गरेका छन्। भाइरल भिडियोमा उनी बाल्टिनबाट दूध आफूमाथि खन्याउँदै बारम्बार भन्दै छन्, “आज म स्वतन्त्र छु!” — र अत्यन्तै हर्षित मुद्रामा देखिन्छन्।

सम्बन्ध विच्छेदको कारण

मानिक अलीका अनुसार, उनकी पत्नीको अर्काे पुरुषसँग प्रेम सम्बन्ध थियो, जसका कारण वैवाहिक जीवन तनावपूर्ण बनेको थियो। उनले बताएअनुसार उनकी श्रीमती पहिले पनि दुई पटक घर छाडेर गएकी थिइन्, तर नाबालिग छोरीको खातिर उनले उनलाई पुनः घर फर्काएका थिए। तर यो समस्या झन जटिल बन्दै गएपछि उनले अन्ततः कानुनी रुपमा सम्बन्ध विच्छेदको निर्णय लिएका थिए।

मानिकले अदालतबाट आधिकारिकरुपमा डिभोर्सको प्रमाणपत्र प्राप्त गरेपछि यो कदम चालेका हुन्। उनले आफूले निकै लामो समयदेखि सहन गरेको मानसिक पीडाबाट मुक्ति पाएको अनुभूति गर्दै यो ‘दूध स्नान’ कार्यक्रमको आयोजना गरेका हुन्।

सामाजिक सञ्जालमा बहस

उनको यो कदमले सामाजिक सञ्जालमा धेरैलाई चकित तुल्याएको छ। कोही यसलाई हाँसोको रुपमा लिएका छन् भने कतिपयले वैवाहिक पीडाको सार्वजनिक अभिव्यक्ति भन्दै सहानुभूति पनि व्यक्त गरेका छन्। यो घटनाले वैवाहिक सम्बन्ध र पुरुष अधिकारबारे पनि बहस चर्काएको छ।