काठमाडौं महानगरपालिकाभित्र सार्वजनिक स्थलमा धुम्रपान गरे प्रत्येक पटक पाँच सय रुपैयाँ जरिवाना गरिने

साउन ९, काठमाडौं, अब काठमाडौं महानगरपालिका क्षेत्रभित्र सार्वजनिक स्थलमा धुम्रपान गरे कारबाही पक्कापक्की हुने भएको छ। महानगरपालिकाले हालै सम्पन्न नगरसभाबाट पारित आर्थिक ऐन २०८२/८३ अन्तर्गत सार्वजनिक स्थानमा धुम्रपान गरेमा प्रत्येक पटक ५०० रुपैयाँ जरिवाना गर्ने कानुनी व्यवस्था लागू गरेको हो।

नगर प्रहरी प्रमुख राजुनाथ पाण्डेका अनुसार सार्वजनिक स्थानमा धुम्रपान गर्ने बानीबिरुद्ध सर्वसाधारणको गुनासो बढ्दै गएपछि यसपटक आर्थिक ऐनमार्फत कडाइ गरिएको हो। पाण्डेले भने, “पछिल्लो समय सार्वजनिक स्थानमा धुम्रपान गर्नेहरुको संख्या बढ्दै गएको र त्यसले अन्य नागरिकको स्वास्थ्यमा समेत असर पुर्‍याइरहेको गुनासो थुप्रै आएका थिए। अब प्रत्येकपटक धुम्रपान गरिएमा सोही अनुसार जरिवाना गरिनेछ। निजी सम्पत्तिबाहेकका अन्य स्थानमा धुम्रपान निषेध गरिएको छ।”

अब यस्ता कार्य गरे पनि जरिवाना हुनेछ:

🔸सार्वजनिक स्थलमा सवारी पार्किङ गरेबापत:

मोटरसाइकल/स्कुटर: १,००० रुपैयाँ

कार, जीप, डेलिभरी भ्यान: २,५०० रुपैयाँ

मिनीबस, मिनीट्रक: ३,५०० रुपैयाँ

बस, ट्रक: ५,००० रुपैयाँ

🔸निषेधित विज्ञापन गरेमा

प्रचलित कानूनले प्रतिबन्ध गरेको विज्ञापन: १०,००० रुपैयाँ

विना अनुमति होडिङ बोर्डमा प्रचार: १० हजारदेखि १ लाख रुपैयाँसम्म

🔸फोहरयुक्त प्रचार सामग्री वितरण गरेमा

पर्चा, पोष्टर, स्टिकर, ब्रोसर आदि टाँस/वितरण: ५ हजारदेखि ५० हजार रुपैयाँसम्म

🔸रुखविरुवा, पर्खाल, खम्बा क्षति गरेमा वा लेखेमा

जरिवाना: ५ सयदेखि ५० हजार रुपैयाँसम्म

🔸स्वीकृति विना बेलुन वा स्वागतद्वार बनाएमा

५ हजारदेखि ५० हजार रुपैयाँसम्म जरिवाना तोकिएको छ।

नागरिकको स्वास्थ्य र शहरी अनुशासनका लागि कडाइ
महानगरपालिकाको भनाइमा यो निर्णय काठमाडौंको सार्वजनिक स्थानलाई स्वच्छ, सुरक्षित र अनुशासित बनाउने उद्देश्यसहित गरिएको हो। अब नियम उल्लंघन गर्नेलाई कडाभन्दा कडा कारबाही गरिने महानगरको चेतावनी छ।

नोट: यदि तपाईं सार्वजनिक स्थानमा धुम्रपान गरिरहेका देख्नुभयो भने, सम्बन्धित निकायलाई जानकारी गराउनुहोस्। शुद्ध शहर, स्वस्थ समाज सबैको चाहना हो।