सुन–चाँदीमा नयाँ रेकर्ड : सुन प्रतितोला २ लाख ३ हजार ६ सय, चाँदी २४२५ मा पुगेको छ

१५ भदौ, काठमाडौं । नेपाली बजारमा सुन–चाँदीको मूल्यले फेरि नयाँ रेकर्ड कायम गरेको छ । नेपाल सुनचाँदी व्यवसायी महासंघले आइतबार तोकेको मूल्य अनुसार सुन प्रतितोला २ लाख ३ हजार ६ सय रुपैयाँ पुगेको छ ।

एकै दिनमै प्रतितोला ३ हजार रुपैयाँले उक्लिएको सुनले हालसम्मकै उच्च मूल्य तोडेको हो । यसअघि शुक्रबार २ लाख ६ सय रुपैयाँमा कारोबार भएको सुन आइतबार थप महँगिएर नयाँ कीर्तिमान कायम गरेको हो ।

चाँदीको मूल्य पनि ऐतिहासिक उचालमा पुगेको छ । अघिल्लो दिन २३६० रुपैयाँमा कारोबार भएको चाँदी आइतबार प्रतितोला २४२५ रुपैयाँमा पुगेको छ । एकै दिन ६५ रुपैयाँले वृद्धि भएको यो मूल्य हालसम्मकै उच्च हो ।

महासंघका अनुसार अन्तर्राष्ट्रिय बजारमा भएको मूल्यवृद्धिले नेपाली बजारमा प्रत्यक्ष असर पारेको हो । शुक्रबार अन्तर्राष्ट्रिय बजारमा सुन प्रतिऔंस ३४४७ अमेरिकी डलरमा कारोबार भएको थियो, जुन अहिलेसम्मकै उच्च हो ।

सुन–चाँदीको मूल्य वृद्धिपछि नेपाली बजारमा लगानीकर्तामाझ चहलपहल बढेको देखिएको छ । शनिबार र आइतबार विश्व बजार बन्द हुने भएकाले सोमबारदेखि मूल्य फेरि हेरफेर हुने व्यवसायीहरूको अनुमान छ ।