नगरपालिकाको अस्पताल निर्माण सम्पन्न अस्पतालको साँचो नगरप्रमुख तामाङ र प्रशासकीय अधिकृतलाई हस्तान्तरण

काठमाण्डौ, ३ साउन । सिन्धुपाल्चोकको मेलम्ची नगरपालिकाको १५ शैयाको अस्पताल भवनको निर्माण सम्पन्न भएको छ । भवन निर्माण सम्पन्न गरी निर्माण व्यवसायीले अस्पतालको साँचो नगरप्रमुख आइतमान तामाङ र प्रमुख प्रशासकीय अधिकृत निमेष मिश्रलाई हस्तान्तरण गरेका छन् ।

आइतबार नगरपालिकामा साँचो ग्रहण गर्दै नगरप्रमुख तामाङले आगामी दशैं आसपासमा नयाँ भवनबाट अस्पताल सञ्चालनको तयारी भइरहेको बताउँनुभएको छ ।

नयाँ पोष्टसँग कुरा गर्दै नगरप्रमुख तामाङले संघ र प्रदेश सरकारले अस्पतालका लागि बजेट विनियोजन नगरेका कारण समस्या भएपनि नगरपालिकाको आफ्नै स्रोतबाट आवश्यक उपकरण खरिद गरि अस्पताल सञ्चालनमा ल्याउन लागिएको जानकारी दिनुभयो ।

उहाँले भन्नुभयो–‘संघ र प्रदेशले अस्पतालका लागि बजेट दिएन । हामीले यो वर्ष ५ करोड बजेट राखेका छौं, नगरपालिकाबाट ठेक्का आह्वान गर्छौँ । अस्पतालसम्म जानका लागि बाटो बनाउँनुपर्नेछ । अहिले बाटो बनाउँनका लागि ठेक्का निकालेका छौँ ।

बाटो बनिसकेपछि संभव भए दशैं अगाडी नै सञ्चालन हुन्छ, वर्षातको बेला भएकोले अहिले बाटोको काम नहोला । तिहार अगाडिसम्म सञ्चालन गर्ने तयारीमा छौँ । उहाँले संघ र प्रदेशले बजेट नदिएपनि नगरबासीको स्वास्थ्य अधिकार सुनिश्चित गर्न नगरपालिकाले स्रोत जुटाएर अस्पताल सञ्चालनमा ल्याउन लागेको जानकारी दिनुभयो ।