१२ भाद्र २०८२, बिहीबार

इजरायली बन्धकको दर्दनाक भिडियो सार्वजनिक, युद्धविरामको माग चुलियो : गाजामा मानवीय संकट भयावह

CB Nepal३ हफ्ता अघि

काठमाडौं । गाजामा सक्रिय लडाकु समूह हमास र प्यालेस्टाइन इस्लामिक जिहाद (PIJ) ले इजरायली बन्धकहरूको पीडादायी अवस्था सार्वजनिक गर्ने भिडियो जारी गरेपछि इजरायलभित्रको राजनीतिक र सामाजिक तापक्रम चर्किएको छ । बन्धकका परिवारहरु गहिरो मानसिक पीडामा छन् भने आम इजरायली जनताले युद्धविरामका लागि सरकारमाथि व्यापक दबाब सिर्जना गरिरहेका छन् ।

गत साता PIJ ले २१ वर्षीय रोम ब्रास्लाभ्स्कीको ६ मिनेट लामो भिडियो सार्वजनिक ग¥यो । केही दिनपछि हमासले २४ वर्षीय एभ्यातार डेभिडको समेत भिडियो सार्वजनिक गर्‍यो । दुबै बन्धकलाई भोकमरी, थकान र कुपोषणको चरम अवस्थामा देखिएको छ । शरीर हाडछालामा झरेको, आँखा गाडिएको, अनुहार पीडाले भरिएको देखिन्छ । भिडियोमा उनीहरू गम्भीर मानसिक तथा शारीरिक संकटमा छन् भन्ने स्पष्ट झल्किन्छ ।

डेभिडलाई अज्ञात सुरुङमा राखिएको देखिएको छ, जहाँ उनी सीमित खाना र पानीमा दिन कटाइरहेका छन् । ब्रास्लाभ्स्कीको भिडियो PIJ ले सम्पर्क टुट्नु केही दिनअघि खिचिएको बताइएको छ, हाल उनको अवस्थाबारे स्पष्ट जानकारी छैन ।

विश्लेषकहरूका अनुसार यी भिडियोहरू लडाकु समूहहरूले मनोवैज्ञानिक दबाब सिर्जना गर्न प्रयोग गरेका छन् । सार्वजनिक प्रतिक्रियाले यो पुष्टि गरेको छ, किनकि इजरायली जनताले राजधानी तेल अभिभ र जेरुसेलममा हजारौँको संख्यामा विरोध प्रदर्शन गर्दै नेतन्याहू सरकारलाई युद्धभन्दा बन्धकको जीवन जोगाउनेतर्फ ध्यान दिन आग्रह गरेका छन् ।

बन्धक परिवारहरूले सार्वजनिक मिडियालाई सम्पूर्ण भिडियो नप्रसारण गर्न अपिल गरेका छन् । ब्रास्लाभ्स्कीको परिवारले केवल सानो अंश प्रसारण गर्न अनुमति दिएको छ । उनीहरूले सरकार र अन्तर्राष्ट्रिय समुदायलाई हस्तक्षेप गरी तत्काल रिहाइ सुनिश्चित गरिदिन आग्रह गरेका छन् ।

हमास र PIJ माथि ‘जानाजान बन्धकलाई भोकमरीमा राख्ने’ आरोप लागेको छ । तर हमासले गाजाको खाद्य संकटको मुख्य कारण इजरायली नाकाबन्दी भएको बताउँदै आफूहरूले बन्धकलाई आफूहरूकै खाना बाँडेर दिएको दाबी गरेको छ । अल–कसाम ब्रिगेड्सका प्रवक्ता अबु उबेइदाले भनेका छन्, ‘हामी पनि भोकै छौं, तर बन्धकलाई पनि उस्तै खाना दिइन्छ । गाजाको समस्या इजरायली नाकाबन्दीको परिणाम हो ।’

गाजामा अवस्था दिन प्रतिदिन बिग्रँदै गएको छ । संयुक्त राष्ट्रसंघ र विश्व स्वास्थ्य संगठन (WHO) ले ‘भयावह भोकमरी’ को चेतावनी दिएका छन् । डब्ल्यूएचओ अनुसार जुलाई महिनामात्रै ५ हजारभन्दा बढी बालबालिका कुपोषणको उपचारका लागि अस्पताल भर्ना भएका छन् । गाजाको स्वास्थ्य मन्त्रालयले भोकमरी र जलवियोजनबाट ९३ बालबालिकासहित १७५ जनाको ज्यान गएको जनाएको छ ।

इजरायली बौद्धिक, सुरक्षा र राजनीतिक वृत्त पनि विभाजित देखिएको छ । इजरायली खुफिया संस्था शिन बेट र मोसादका पूर्व प्रमुखसहित ५५० जना सुरक्षा अधिकारीहरूले अमेरिकी राष्ट्रपति डोनाल्ड ट्रम्पलाई पत्र लेखेर युद्धविराममा मध्यस्थता गरिदिन आग्रह गरेका छन् । ‘शुरुको युद्ध जायज थियो, तर अब यो अन्यायपूर्ण दिशामा गइरहेको छ’, उनीहरूको भनाइ छ ।

इजरायली प्रधानमन्त्री नेतन्याहूले भने हमासमाथि ‘अकल्पनीय क्रूरता’ देखाएको आरोप लगाएका छन् । उनले रेड क्रससँगको भेटमा बन्धकको अवस्था गम्भीर भएको स्वीकार्दै तत्काल खाना, औषधि र मानवीय सहायता पुर्‍याउन आग्रह गरेका छन् ।

यता, हमासले भने सोमबार नयाँ प्रस्ताव अघि सारेको छ । प्रस्ताव अनुसार इजरायलले यदि हवाई आक्रमण रोकेर मानवीय सहायता मार्ग खोल्यो भने बन्धकलाई सहायता दिन रेड क्रसलाई पहुँच दिइनेछ । यसले वार्तामा नयाँ गति ल्याउने अपेक्षा गरिएको छ ।

यस घटनाले अन्तर्राष्ट्रिय प्रतिक्रियासमेत निम्त्याएको छ । फ्रान्सका राष्ट्रपति इमानुएल म्याक्रोनले बन्धकको भिडियोप्रति दुःख व्यक्त गर्दै युद्धविराम र मानवीय सहायता आवश्यक रहेको बताएका छन् । जर्मन चान्सलर मर्ज र अमेरिकी विदेश मन्त्रालयले पनि वार्ताको मार्गमा लचकता देखाउन आग्रह गरेका छन् ।

गाजाको संकटको गहिराई, बन्धकको पीडा र युद्धको अवसानको माग अहिले अन्तर्राष्ट्रिय चासोको केन्द्रमा छ । भिडियोमार्फत देखिएको यथार्थले यो द्वन्द्व अब सहनसक्ने सीमाभन्दा धेरै अगाडि पुगेको संकेत दिएको छ ।

रमाईलो र मनोरञ्जन खोज्दै हुनुहुन्छ?
भिडियो, गीत–सङ्गीत र सकारात्मक उर्जाले भरिपूर्ण सामग्री हेर्न चाहनुहुन्छ भने Chiranjivi Bhandari YouTube च्यानल मा आजै जोडिनुहोस् !

मन छुने भिडियोहरू यहीं छन्:
Chiranjivi Bhandari YouTube Channel

सम्पूर्ण समाचार र रमाईलोका लागि:
CB Nepal फेसबुक पेज
रमाईलो कुरा फेसबुक पेज
CBNepal YouTube च्यानल

हामी तपाईंलाई मनोरञ्जनका साथसाथै पलपलको सूचना, समाचार र सामाजिक अपडेटहरू दिने निरन्तर प्रयासमा छौं।

आउनुहोस्, काँधमा काँध मिलाएर हातेमालो गरौँ।
Like, Share, Follow अनि Subscribe गर्न नबिर्सिनु होला है हजुर!

1. Na Jiuna Sake Na Marna Sake – Satya Raj Acharya & Chiranjivi Bhandari