इजरायली आक्रमणमा सहासी पत्रकार अनस अल-शरीफसहित ६ जनाको हत्या

गाजा, आइतबार राति – गाजा सहरमा इजरायली आक्रमणमा अल जजिराका साहसी पत्रकार अनस अल-शरीफसहित ६ जना पत्रकारको ज्यान गएको छ। मृतकमध्ये चार जना अल जजिरासँग आबद्ध थिए। अल-शिफा अस्पतालले उनीहरू मारिएको पुष्टि गरेको छ।

इजरायली सेनाले अल-शरीफलाई हमासको समूहको नेतृत्व गरेको आरोप लगाउँदै लक्षित हमला गरेको दाबी गरेको छ। सोही आक्रमणमा अल जजिराका अर्का प्रमुख पत्रकार मोहम्मद क्रेके पनि मारिएका छन्।

आक्रमण हुनु केही मिनेटअघि अल-शरीफले सामाजिक सञ्जालमा चेतावनी दिएका थिए –

> “यदि यो पागलपन अन्त्य भएन भने, गाजा भग्नावशेषमा परिणत हुनेछ, जनताको आवाज बन्द हुनेछ, अनुहार मेटिनेछ, र इतिहासले तपाईंलाई मौन साक्षीका रूपमा सम्झिनेछ।”

अस्पताल निर्देशकका अनुसार, अल-शरीफ अल-शिफा अस्पतालको प्रवेशद्वार नजिकै पत्रकारहरूसँग टेन्टमा बसिरहेका बेला आक्रमण भयो।

संयुक्त राष्ट्रसंघ र पत्रकार सुरक्षा समिति (CPJ) ले यसलाई पत्रकारितामाथिको योजनाबद्ध आक्रमण भन्दै कडा आपत्ति जनाएका छन्। युद्ध सुरु भएदेखि गाजामा १८६ जना पत्रकारको हत्या भइसकेको छ।

अन्तिम सन्देशमा अल-शरीफले लेखेका थिए –
> “तपाईंहरूको आवाज नरोकोस्, सीमाले बाटो नछेकून्, र मातृभूमिको स्वतन्त्रताको घाम उदासम्म हामी पुल बन्दै रहौं।”

अन्तर्राष्ट्रिय विश्लेषकहरूका अनुसार, यो घटना गाजाबाट बाहिरी संसारमा सत्य उजागर गर्ने अन्तिम आवाजलाई चुप पार्ने योजनाबद्ध प्रयास हो।