प्रदर्शनका क्रममा लुटिएका सामान खरिद-बिक्री नगर्न सर्वसाधारणलाई नेपाल प्रहरी केन्द्रीय अनुसन्धानको आग्रह

काठमाण्डौ २७ भाद्र । प्रदर्शनका क्रममा लुटिएका सामान खरिद-बिक्री नगर्न सर्वसाधारणलाई आग्रह नेपाल प्रहरीको केन्द्रीय अनुसन्धानको आग्रह, प्रदर्शनको फाइदा उठाउँदै चोरी भएका सामान किनेको वा लुकाएको पाइएमा कडा कानुनी कारबाही गरिने ब्यूरोले चेतावनी दिएको हो।

नेपाल प्रहरीको केन्द्रीय अनुसन्धान ब्यूरो (सीआईबी) ले भदौ २३ र २४ गते भएको प्रदर्शनका क्रममा लुटिएका सामान खरिद-बिक्री नगर्न सर्वसाधारणलाई आग्रह गरेको छ। ब्यूरोले शुक्रबार एक प्रेस विज्ञप्ति जारी गर्दै प्रदर्शनका क्रममा सरकारी तथा निजी भवन, बैंक तथा वित्तीय संस्थाहरूमा आगजनी र तोडफोड गर्नुअघि त्यहाँबाट ऐतिहासिक दस्तावेज, बहुमूल्य वस्तु, नगद, र अन्य महत्त्वपूर्ण जिन्सी सामान लुटपाट भएको सूचना प्राप्त भएको जनाएको छ।

लुटिएका ती सामग्रीहरू बजारमा बिक्री-वितरण भइरहेको भन्ने सूचनाका आधारमा ब्यूरो र अन्य प्रहरी कार्यालयहरूले अनुसन्धान अगाडि बढाएको विज्ञप्तिमा उल्लेख छ। ‘चोरी तथा लुटपाट भएका सामानहरूको खरिद, बिक्री तथा सञ्चय गरेको पाइएमा प्रचलित कानुनबमोजिम अनुसन्धान गरी कारबाही हुने व्यहोरा जानकारी गराइन्छ,’ ब्यूरोद्वारा जारी विज्ञप्तिमा भनिएको छ।