ललितपुरको गोदावरीमा ६०% जारको पानीमै दिसाजन्य फोहोर! नागरिकको स्वास्थ्यमा गम्भीर जोखिम

ललितपुर, गोदावरी – देशकै शिक्षित र समृद्ध नगरहरूमध्ये एक मानिने ललितपुरको गोदावरी नगरपालिकामा चकित पार्ने खुलासा भएको छ। यहाँ वितरण हुने जारको पानी परीक्षण गर्दा झन्डै ६० प्रतिशत जारमा दिसाजन्य पदार्थ (Coliform Bacteria) पाइएका छन्, जसले नगरवासीको स्वास्थ्यमाथि गम्भीर जोखिम सिर्जना गरिरहेको छ। नगरपालिकाले हालै गरेको खानेपानी जार परीक्षणमा यो खतरनाक तथ्य बाहिरिएको हो। पानीमा पाइने कोलिफर्म जीवाणु प्रायः दिसाजन्य फोहोरजन्य स्रोतबाट आउने भएकाले यसले झाडा, हैजा, टाइफाइड जस्ता रोगको जोखिम बढाउने विज्ञहरू बताउँछन्। गोदावरी नगरपालिकाका स्वास्थ्य शाखा प्रमुखका अनुसार, परीक्षण गरिएका १० मध्ये ६ वटा जारमा कोलिफर्म भेटिएको हो।