क्यानडा गएका आप्रवासीहरू छिटो छिटो त्यहाँबाट किन बाहिरिए

काठमाडौँ, १६ कार्तिक । भर्खरै क्यानडा गएका आप्रवासीहरू छिटो छिटो त्यहाँबाट बाहिरिइरहेका छन् । हालै सार्वजनिक भएको एउटा अध्ययन प्रतिवेदनले यस्तो देखाएको हो । विदेशीहरूलाई ल्याएर आर्थिक वृद्धिदर उकास्ने सरकारी नीतिमा यो प्रवृत्ति ठुलो खतराको रूपमा मडारिरहेको स्पष्ट देखिन्छ ।
सन् १९८० को दशकदेखि नै क्यानडा छाड्ने आप्रवासीहरूको सङ्ख्या बढ्दो छ । हालैका वर्षमा यो दर झनै बढेको छ । यसले नवआगन्तुकहरूले क्यानडा बसाई सरेर आउनुको फाइदा नदेखेको सङ्केत गरेको इन्स्टिच्युट फर क्यानेडियन सिटिजनशिप र कन्फ्रेन्स बोर्ड अफ क्यानडाले आप्रवासीबारे गरेको एउटा अध्ययनले देखाएको हो ।

मंगलबार सार्वजनिक भएको उक्त प्रतिवेदनले नवआगन्तुक आप्रवासीहरूको आशा र अपेक्षा पूरा गर्न क्यानडाले नसक्दा उत्पन्न हुन सक्ने जोखिमबारे उजागर गरेको छ । अहिले क्यानडामा घर छोइनसक्नु भएको छ, सहज रूपमा घर किन्न सक्ने अवस्था छैन । यस्तै स्वास्थ्य हेरचाह प्रणाली समस्याग्रस्त छ । अल्प रोजगारीलगायत समस्या पनि छन् ।

यस्तोमा आप्रवासीहरूबिच क्यानडा बसाइँप्रति देखिएको मोहभंगले जनसङ्ख्या वृद्धिमा एक पछि अर्को गर्दै बर्सेनि रेकर्ड बनाइरहेको देशमा स्थिति उल्टिन सक्ने चिन्ता बढाएको छ । प्रतिवेदन क्यानडाको बृहत्तर समाज र उसले नियन्त्रण गर्नै नसक्ने असफलताको झल्को भएको इन्स्टिच्युट फर क्यानेडियन सिटिजनशिपका प्रमुख कार्यकारी अधिकारी ड्यानियल बर्नहार्ड भन्छन् ।

आप्रवासीहरूले ‘भयो बस्दिन’ भन्दै क्यानडा छाडेर हिँडिरहनु क्यानडाको समृद्धिमै वास्तविक अस्तित्वको खतरा भएको बर्नहार्डको भनाइ छ । आफूहरू जाग्न अनि आप्रवासीहरूलाई टिकाइराख्न पहल गर्न जरुरी भएको उनको भनाइ छ । यस्तैगरी आप्रवासीहरु बाहिरिन थाले भने क्यानडा ठुलो समस्यामा फस्नेमा पनि उनले जोड दिएका थिए ।

वृद्ध जनसङ्ख्या बढ्दै गएर काम गर्ने उमेर समूहको जनसङ्ख्या खुम्चिन थालेपछि प्रधानमन्त्री जष्टिन ट्रुडोको सरकारले आवश्यक कर्मचारीको पूर्ति गर्न आप्रवासनको सहारा लिइरहेको छ । विदेशीहरूको आगमन बढ्न थालेपछि क्यानडामा हालैका वर्षमा जनसङ्ख्या पनि बढेको छ ।

तर सरकारको यो नीतिले घर अभावको विद्यमान समस्या झनै बढाएको अनि पूर्वाधार र स्वास्थ्य हेरचाह जस्ता सेवामा चाप बढाएको भन्दै सरकारको चर्को आलोचना पनि भइरहेको छ ।
प्रतिवेदनका अनुसार सन् २०१७ र सन् २०१९ मा क्यानडा छाडेर जाने आप्रवासीको वार्षिक दर बढेको देखाएको छ ।

ती दुई वर्षमा यो सङ्ख्या क्रमशः १ दशमलव १ प्रतिशत र १ दशमलव १८ प्रतिशत थियो । यो भनेको २० वर्षयताकै उच्च हो । सन् १९८२ पछि बर्सेनि क्यानडाले स्थायी बसोबास अनुमति दिएको औसत शून्य दशमलव ९ प्रतिशत मानिस पलायन भएको देखिन्छ । यो सङ्ख्या अहिले झट्ट हेर्दा धेरै होइन तर समय बढ्दै जाँदा यो सङ्ख्या बढेर २० प्रतिशतमाथि उक्लिने अनुमान गरिएको छ ।

क्यानडामा आप्रवासी कामदारहरूको सङ्ख्या उच्च भएको चिन्तामा आप्रवासन नीतिप्रति आम क्यानडाली नागरिकको समर्थन घटेको यही हप्ताको सुरुमा सार्वजनिक भएको एउटा सर्वेक्षणको प्रतिवेदनले देखाएको थियो । उता, नव आगन्तुकहरू क्यानडामा आफ्नो जिन्दगीप्रति खुसी छैनन् ।

अहिले विश्वभर नै विकसित देशबिच दक्ष कामदारलाई कसले तान्ने होड चलिरहेको छ । क्यानडामा बसाइँप्रति आप्रवासीहरूमा देखिएको निरुत्साहले क्यानडामा पिआर लिएर बस्न खोज्ने आप्रवासीको सङ्ख्या घटाउने देखिन्छ । सन् २००१ देखि सन् २०२१ को बिचमा क्यानडामा आएको १० वर्षभित्र नागरिकता लिने स्थायी बासिन्दाको अनुपात ४० प्रतिशतले घटेको देखिन्छ ।

क्यानडाले विद्यमान समस्याहरूलाई समाधान गर्न सकेन र अत्यावश्यक सेवाहरू दिन सकेन अनि आप्रवासीहरूका लागि क्यानडा बसाई थेग्ने नसक्ने भयो भने उनीहरू बाहिरिनेछन् । क्यानडामा उनीहरू खुसीका साथ बसुन्, अनि त्यहाँको अर्थतन्त्रमा योगदान दिउन्, क्यानडाली नागरिक बनुन् अनि साझा सफलतामा योगदान दिउन् भन्ने आफूहरूले सुनिश्चित गर्न जरुरी भएको बर्नहार्ड बताउँछन् ।

हजुर कता ? रमाईलो तथा मनोरंजन’ भिडियोहरु एता chiranjivi bhandari youtube च्यानलमा जोडिनुहोला है हजुर’ ? साथै सम्पूर्ण समाचार’को लागि फेसबुक पेज Cb Nepal मा र रमाईलो कुरा डट कम र cbnepal यूट्यूब च्यानलमा पनि जोडीनुहोला नबिर्सिकन है हजुर ?’ तपाइहरुलाई मनोरंजन सहित पलपलको सुचना तथा समाचार दिने हाम्रो प्रयास’ आउनुहोस काँधमा काँध मिलाई हातेमालो गरौँ |