मेस्सीले लगाएको ६ वटा जर्सीको सेट एक अर्ब तीन करोड ४८ लाख २६ हजार नेपाली रुपैयाँमा बिक्री भयो

काठमाडौँ । कतार विश्वकपका क्रममा अर्जेन्टिना स्टार लियोनल मेस्सीले लगाएको जर्सी निकै ठुलो रकममा बिक्री भएको छ । सन् २०२२ मा सम्पन्न विश्वकपका क्रममा ३६ वर्षीय मेस्सीले लगाएको ६ वटा जर्सीको सेट कुल ७८ लाख अमेरिकी डलर (करिब एक अर्ब तीन करोड ४८ लाख २६ हजार नेपाली रुपैयाँ) मा बिक्री भएको हो ।

मेस्सीले उक्त विश्वकपमा लगाएको जर्सी अमेरिकाको न्यु योर्कमा लिलामीमा राखिएको थियो । मेस्सीकै कप्तानीमा अर्जेन्टिनाले कतार विश्वकपको उपाधि चुमेको थियो । अर्जेन्टिनाले उक्त विश्वकपको फाइनलमा फ्रान्सलाई पेनाल्टी सुटआउटमा हराएको थियो ।

मेस्सीले उक्त विश्वकपको समूहगत चरणको खेलमा लगाएको दुईसहित प्रिक्वार्टरफाइनल, क्वार्टरफाइनल, सेमिफाइनल र फाइनलमा लगाएको जर्सी लिलामीमा राखिएको थियो । कुनै पनि फुटबल खेलाडीले खेलका क्रममा लगाएको जर्सी लिलामीबाट प्राप्त भएको यो इतिहासकै दोस्रो ठुलो सर्वाधिक रकम पनि हो ।

यसअघि अर्जेन्टिनाकै सर्वकालीन महान फुटबलर डिएगो म्याराडोनाले लगाएको जर्सी सन् २०२२ मा ७१ लाख पाउन्ड (करिब एक अर्ब २० करोड २५ लाख २७ हजार नेपाली रुपैयाँ) मा लिलामी भएको थियो । म्याराडोनाले एक खेलका क्रममा हातले गोल गरेका थिए । उनको त्यो गोललाई रेफ्रीले समेत ठम्याउन सकेका थिएनन् ।

त्यसपछि म्याराडोनाले त्यो गोललाई भगवानको हातबाट भएको गोल (ह्यान्ड अफ गड) भनेर सम्बोधन गरेका थिए । म्याराडोनाको त्यो गोल अहिले पनि विश्वभर ‘ह्यान्ड अफ गड’ का नामले चर्चित छ । त्यही खेलमा म्याराडोनाले लगाएको जर्सी सन् २०२२ मा लिलामी गरिएको थियो ।

कीर्तिमानी रूपमा आठ पटक बालन डी’ओरको उपाधि जितिसकेका मेस्सी हाल अमेरिकी क्लब इन्टर मियामीबाट व्यावसायिक फुटबल खेल्छन् । मेसी विश्वकप फुटबलको एउटै संस्करणमा समूहगत चरण, प्रिक्वार्टरफाइनल, क्वार्टरफाइनल, सेमिफाइनल र फाइनलमा गोल गर्ने एकमात्र खेलाडी पनि हुन् ।

उनले कतार विश्वकपमा सातवटा खेले खेलेका थिए । तर, समूहगत चरणमा उनले दुईवटा खेलमा एउटै जर्सी प्रयोग गरेका थिए । त्यसैले ६ वटा जर्सीमात्र लिलामीमा राखिएको हो । जर्सी लिलामीबाट प्राप्त रकमको एक भाग दुर्लभ रोगबाट पीडित बालबालिकाको सहयोगका लागि दान गरिने छ ।

जर्सी लिलामीमा सहभागी भएको सोथेबीका अनुसार, लिलामीबाट प्राप्त आम्दानीको एक भाग लियो मेस्सी फाउन्डेसनको सहयोगमा सेन्ट जोन डे डेउ बार्सिलोना बाल अस्पतालको नेतृत्वमा युनिकास परियोजनालाई दान गरिने छ ।

हजुर कता ? रमाईलो तथा मनोरंजन’ भिडियोहरु एता chiranjivi bhandari youtube च्यानलमा जोडिनुहोला है हजुर’ ? साथै सम्पूर्ण समाचार’को लागि फेसबुक पेज Cb Nepal मा र रमाईलो कुरा फेसबुक पेज र cbnepal यूट्यूब च्यानलमा पनि जोडीनुहोला नबिर्सिकन है हजुर ?’ तपाइहरुलाई मनोरंजन सहित पलपलको सुचना तथा समाचार दिने हाम्रो प्रयास’ आउनुहोस काँधमा काँध मिलाई हातेमालो गरौँ |