गाजामा त्रासदी गहिरिँदै : तीनमध्ये एक जना भोकै, ९० हजार महिला र बालबालिकालाई जीवनरक्षक उपचारको खाँचो

संयुक्त राष्ट्रसंघको चेतावनी — कुपोषणका कारण मृतक संख्या १२२ पुग्यो

काठमाडौं । युद्धको चपेटामा परेको गाजा पट्टीमा मानवीय संकट दिनानुदिन गहिरिँदै गएको छ। संयुक्त राष्ट्रसंघ अन्तर्गतको विश्व खाद्य कार्यक्रम (WFP) ले गाजाका तीनमध्ये एक जना नागरिक भोकै बस्न बाध्य भएको चेतावनी दिएको छ।

डब्ल्यूएफपीद्वारा जारी विज्ञप्तिमा भनिएको छ, “कुपोषणको अवस्था भयावह हुँदै गएको छ, झण्डै ९० हजार महिला र बालबालिकालाई तत्काल चिकित्सकीय उपचार आवश्यक छ।”

गाजामा हालसालै कुपोषणले झनै विकराल रूप लिएको अन्तर्राष्ट्रिय एजेन्सीहरूले जनाएका छन्। हमासद्वारा सञ्चालित स्वास्थ्य मन्त्रालयका अनुसार, गत शुक्रबार मात्रै कुपोषणका कारण थप ९ जनाको ज्यान गएको छ।

१२२ जना कुपोषणले मृत — ५९ हजार युद्धमा मारिए

इजरायल र हमासबीच गत वर्ष अक्टोबर ७ बाट सुरु भएको युद्धपछि हालसम्म ५९,००० भन्दा बढी नागरिकको मृत्यु भएको उक्त मन्त्रालयको भनाइ छ। त्यसमध्ये कुपोषणका कारण मात्रै १२२ जनाको मृत्यु भइसकेको पुष्टि गरिएको छ।

इजरायल–हमास आआफ्नो दोष एकअर्कालाई

इजरायलले गाजामा खाद्य आपूर्ति नरोकिएको दाबी गर्दै कुपोषणको जिम्मा हमासमा देखाएको छ। तर गाजा क्षेत्रमा खाद्य, पानी, औषधिजस्ता अत्यावश्यक सामग्रीको अत्यन्त अभाव भइरहेका प्रत्यक्षदर्शी रिपोर्टहरूले त्यो दाबीप्रति प्रश्न खडा गरिरहेका छन्।

मानवअधिकार संकटको नयाँ रूप

गाजामा जारी मानवीय संकटले अन्तर्राष्ट्रिय समुदायलाई गम्भीर चासोको विषय बनाएको छ। लाखौँ मानिस विस्थापित, हजारौँ भोकभोकै र लाखौँ कुपोषणको चपेटामा छन्। यस्तो अवस्थामा विश्व समुदायले तत्काल मानवीय सहायता र दीर्घकालीन समाधानको पहल गर्नुपर्ने आवश्यक देखिएको छ।