मेलम्चीमा विद्युतीय भ्यान सेवा सुरु, वातावरणमैत्री यात्रातर्फ महत्वपूर्ण कदम

मेलम्ची ।
श्री जय पाल्चोकी यातायात प्रा.लिले मेलम्चीमा विद्युतीय भ्यान (इभी भ्यान) सेवा औपचारिक रूपमा सुरु गरेको छ। वातावरणमैत्री, आधुनिक र कम खर्चिलो यो सेवाको उद्घाटन मेलम्ची नगरपालिकाका नगरप्रमुख श्री आइतमान तामाङज्यूले विशेष समारोहका बीच गर्नुभयो।

कार्यक्रममा प्रमुख अतिथि तामाङज्यूले सेवाको सफल सञ्चालनका लागि गुणस्तरमा ध्यान दिनुपर्ने आवश्यकता औंल्याउँदै, “नाफासँगै सेवामूलक दृष्टिकोणलाई आत्मसात् गर्न जरुरी छ,” भन्नुभयो। उहाँले नगरपालिकाको तर्फबाट आवश्यक सहयोग प्रदान गरिने प्रतिवद्धता पनि व्यक्त गर्नुभयो।

सो अवसरमा उपप्रमुख उमा प्रधान, समाजसेवी बालकृष्ण देउजा र वडा नं. ११ का अध्यक्ष चन्द्रबहादुर तामाङले इभी सवारीसाधनले इन्धन खपत घटाउने, जलविद्युतको उपयोग बढाउने र वातावरणमा सकारात्मक प्रभाव पार्ने विश्वास व्यक्त गर्नुभयो। उनीहरूले यस्ता नवीन प्रयासहरूले रोजगारी र अवसर सिर्जना गर्ने भन्दै सेवा पारदर्शी, यात्रुमैत्री र सेवामूलक बन्नुपर्नेमा जोड दिए।

अस्थायी ट्राफिक प्रहरी पोस्ट मेलम्चीका हवल्दार विनोदकुमार गिरीले यात्रु र चालकलाई ट्राफिक नियम पालना गर्न आग्रह गर्नुभयो। सोकुनका प्राविधिक राममणी सिग्देलले इभी भ्यानको प्राविधिक विशेषता प्रस्तुत गर्दै न्यून मर्मत खर्च, कम सञ्चालन लागत, न्यून ध्वनि प्रदूषण र छोटो दूरीका लागि उत्कृष्ट सेवा क्षमता रहेको जानकारी दिए।

कम्पनीका अध्यक्ष राजन दुलालका अनुसार हाल मेलम्ची–काठमाडौं रुटमा नियमित सेवा सञ्चालनमा आएको छ भने निकट भविष्यमा हेलम्बु, पाँचपोखरी, इन्द्रावती, मण्डन देउपुर र शंकरापुरसम्म विस्तार गर्ने योजना रहेको छ।

यस सेवाको सुरुआतसँगै मेलम्ची र आसपासका बासिन्दाले सहज, सुरक्षित र वातावरणमैत्री यातायात सुविधा पाउने विश्वास लिइएको छ।