प्रतिनिधि सभा निर्वाचन २०८२ मा रास्वपाको ऐतिहासिक अग्रताले राजनीतिमा तहल्का

काठमाण्डौ २२ फाल्गुन । प्रतिनिधि सभा निर्वाचन २०८२ को प्रारम्भिक नतिजाले नेपाली राजनीतिमा ठूलो फेरबदलको संकेत गरेको छ। राष्ट्रिय स्वतन्त्र पार्टी (रास्वपा) ले काठमाडौँ-१ मा जित हासिल गर्दै खाता खोलिसकेको छ भने देशभरका ४९ निर्वाचन क्षेत्रमा अग्रता कायम गर्दै ऐतिहासिक विजयतर्फ अघि बढेको छ।

रास्वपाको यो लहरका बीच पुराना दलहरूको उपस्थिति निकै कमजोर देखिएको छ। हालसम्मको गणनामा नेपाली कांग्रेस ७ र नेकपा एमाले ४ स्थानमा मात्र अगाडि छन्। यस्तै, हर्कराज साम्पाङ राईको श्रम संस्कृति पार्टीले पनि प्रारम्भिक गणनामा केही स्थानमा बलियो उपस्थिति देखाएको छ।

निर्वाचन आयोगका अनुसार देशभर करिब ६० प्रतिशत मतदान भएको छ। आयोगले मतगणनालाई तीव्रता दिइएको र भोलि (बुधबार) बेलुकासम्म सबै निर्वाचन क्षेत्रको अन्तिम नतिजा सार्वजनिक गरिसक्ने लक्ष्य राखेको छ। रास्वपाको यो अप्रत्याशित अग्रतालाई राजनीतिक विश्लेषकहरूले ‘राजनीतिक भूकम्प’ को संज्ञा दिएका छन्।