दशैँ तिहारमा बासिन्दाहरुमा हुने समस्यालाई मध्यनजर गर्दै, मेलम्चीको फट्टेमा ह्युम पाइप हाल्न सुरु, पुल निर्माण हुने

काठमाण्डौ, २८ असोज । बाढीका कारण हरेक वर्ष सडक सञ्जाल टुट्ने यस क्षेत्रमा ह्युम पाइप हालेर सडक सुचारु गरेसँगै मेलम्ची नगरपालिकाको वडा नम्बर ७ र ८, हेलम्बु गाउँपालिकाका केही वडाहरू तथा पाँचपोखरी थाङ्पाल गाउँपालिकाको बरुवा र बासखर्क लगायतका दुर्गम स्थानसम्म पुग्न स्थानीय बासिन्दालाई निकै सहज हुनेछ ।

चाडबाडको समयमा गाउँ फर्कने यात्रुहरूको चाप र दैनिक उपभोग्य सामग्रीको ढुवानीलाई मध्यनजर गर्दै कार्य तीव्र गतिमा अघि बढाइएको छ। नगरप्रमुख तामाङका अनुसार प्राविधिक टोली र एक्काभेटर (डोजर) प्रयोग गरेर नदीको बहाव व्यवस्थापन गर्दै ह्युम पाइप हाल्ने काम भइरहेकाले आउँदा केही दिनभित्रै काम सम्पन्न भई नियमित रूपमा गाडी चल्न सुरुहुनेछ ।

हरेक वर्ष वर्षायाममा ह्युम पाइप बगाउने र हिउँदमा मात्र बाटो खुल्ने सास्तीको दीर्घकालीन समाधानका लागि सो स्थानमा पक्की पुल निर्माणको प्रक्रिया समेत टुङ्गोमा पुगेको छ । फट्टे खोलामा पक्की पुल निर्माणका लागि टेण्डर (ठेक्का) प्रक्रिया स्वीकृत भइसकेको र आवश्यक बजेट सुनिश्चित भइसकेकाले अब छिट्टै पक्की पुल निर्माण कार्यको समेत थालनी हुने प्रमुख तामाङले बताए । पक्की पुल बनेपछि यस क्षेत्रका हजारौँ नागरिकले बाह्रै महिना सुरक्षित रूपमा यातायात सेवा पाउनेछन् ।

ह्युम पाइप हाल्ने कार्यको सुरुवात र स्थलगत निरीक्षण कार्यक्रममा नगर प्रमुख आइतमान तामाङ, मेलम्ची नगरपालिका वडा नम्बर ७ का वडा अध्यक्ष पासाङ दोङ, वडा नम्बर १० का वडा अध्यक्ष अमृत खनाल, नेपाली कांग्रेस वडा नम्बर ८ का सभापति विक्रम तामाङ, स्थानीय व्यवसायी तथा स्थानीय बासिन्दाहरूको उल्लेख्य उपस्थिति रहेको थियो ।

दशैँ तिहारमा बासिन्दाहरुमा हुने समस्यालाई मध्यनजर गर्दै, मेलम्चीको फट्टेमा ह्युम पाइप हाल्न सुरु, पुल निर्माण हुने ।