१६ करोडको कालोपत्रे एक सातामै भत्कियो! जनताको कर तिनै भ्रष्टलाई पुरस्कार?

कञ्चनपुर, पुनर्वास — देशका ठूला ठूला भाषण र “द्रुत विकास” का नाराबीच कञ्चनपुरको पुनर्वास नगरपालिका–८ मा निर्माण गरिएको सडक मात्रै एक सातामै भत्किएको छ। रातिराति रेनकोट ओढेर पानी परेका बेला कालोपत्रे गरिएको सडक अहिले गर्नासाथै पग्लिएको देखिन्छ। रकम? १६ करोड २५ लाख १७ हजार रुपैयाँ। यति धेरै रकम बिनासम्झौताका भ्रष्ट काममा “स्वाहा” गरिएको देखिन्छ।

सडक विकास होइन, विनाशको नमूना बनेको छ। वर्षातमा भिज्दै, हतारिँदै रातारात “शो अफ” विकास गर्नेहरूको नियत प्रस्ट छ — जनता हेर्न नपाउन्, प्रश्न गर्न नपाउन् भन्ने मात्र हो उद्देश्य। तर सडकले आफैं विरोधको आवाज बुलन्द बनाएको छ।

जनताको आक्रोशः “हाम्रा कर, हाम्रो पसिनाको पैसा यस्तो भत्किएको कालोपत्रेमा गाड्न? नेता र ठेकेदारको मिलेमतोमा खर्बौं उड्छ, सडक भने एक सातामा गायब!” – स्थानीय युवा रमेश चौधरीले भने।

“हाम्रो गाउँमा न त अस्पताल छ, न राम्रो स्कुल – तर यस्तो भत्किएको सडक बनाउन १६ करोड कहाँबाट आयो? किन आयो?” – स्थानीय महिलाको प्रश्न।

“भ्रष्ट नेतालाई ५१ तोपको सलामी छ भने, हामी गरिब जनता लाश जस्तै चुपचाप सड्नुपर्ने हो?” – वृद्ध किसानको व्यथा।

जनताको विवेकसँगको धोका

सार्वजनिक लगानीमा निर्माण गरिएको यस्तो सडक प्राविधिक मापदण्ड विपरीत, पारदर्शिताविहीन र निर्माण सामग्रीमै घटिया प्रयोग भएको पुष्टि भइसकेको छ। कुन कम्पनीले निर्माण गर्‍यो? कसले निगरानी गर्‍यो? किन रेनकोट ओढेर रातमा कालोपत्रे गर्नुपर्ने भयो? यी प्रश्नको जवाफ दिन कुनै निकाय तयार छैन।

विकासको नाममा हुने “असारे दौड” ले हरेक वर्ष जनताको करलाई लुट्ने परम्परा बनिसकेको छ। देशमा विकास होइन, “भ्रष्टाचारको लहर” छ।

जनताले प्रश्न गर्छन् — किन चुप बस्ने सरकार?

कसले जिम्मा लिनेछ यो १६ करोडको बर्बादीको?

किन यस्ता ठेकेदारहरूलाई जेल हालिँदैन?

कहिलेसम्म हामी हाम्रै पसिनाबाट चोइटिएको कर पैसा जलिरहेको हेर्नुपर्ने?

नेता गगन चढ्छन्, जनता खाल्डोमा झर्छन्।
ठेकेदार घाम ताप्छन्, किसान धान सुकाउँछन्।
भ्रष्टहरू मालामाल, जनता विस्थापित।
देशको विकास होइन, पैसाको बलिदान।

अबको जवाफ जनताबाट नै आउनुपर्छ।
कञ्चनपुरको सडक भत्किए पनि जनताको चेतना भत्किएको छैन।

समाचार: रोशन श्रेष्ठ