त्रिपालमुनि सुतेकी महिला र सात वर्षीया बालिकाको ढुङ्गाले लागेर ज्यान गयो

अछाममा महिनावारी बार्ने परम्पराले फेरि कसेको बलि : त्रिपालमुनि सुतेकी महिला र सात वर्षीया बालिकाको ढुङ्गाले लागेर ज्यान गयो

१३ भदौ, कैलाली । अछाममा पुरानो परम्परा महिनावारी बार्ने प्रथा (छाउपडी) ले फेरि दुःखद घटना निम्त्याएको छ । पञ्चदेवल विनायक नगरपालिका–८, सेलापानीमा घर नजिकै खेतबारीमा त्रिपालमुनि सुतिरहेका बेला माथिबाट खसेको ढुङ्गाले लागेर ३५ वर्षीया निम खनाल र ७ वर्षीया बालिका कविता भण्डारीको घटनास्थलमै मृत्यु भएको छ ।

उनीहरुसँगै सुतिरहेकी कविताकी आमा ३६ वर्षीया रत्ना भण्डारी गम्भीर घाइते भएकी छन् । उनलाई उपचारका लागि बारला स्वास्थ्य चौकी पठाइएको छ ।

वडा अध्यक्ष छत्रबहादुर शाहीका अनुसार मृतक महिला रत्ना भण्डारी महिनावारी भएका कारण घरभित्र बस्न नदिई त्रिपालमुनि बस्न बाध्य भएका थिए । उनीसँगै उनकी ७ वर्षीया छोरी कविता पनि “आमाको मायाले” भन्दै साथ दिन पुगेकी थिइन् । तर, ढुङ्गा खस्दा दुवैको ज्यान गयो ।

मृतक खनाल र भण्डारी दुवै माइत आएका बेला यस्तो दुर्घटना घटेको प्रहरीले जनाएको छ ।
अछाममा छाउगोठ भत्काइए पनि अझै पनि महिलाहरूलाई महिनावारीका बेला घरबाहिर त्रिपाल टाँगेर वा ओढारमा बस्न बाध्य गराउने प्रथा जारी रहेको स्थानीयले बताएका छन् ।

यो घटनाले पुनः प्रश्न उठाएको छ – छाउपडी प्रथा कानुनी रूपमा प्रतिबन्धित हुँदाहुँदै पनि ग्रामीण क्षेत्रमा किन अझै अन्त्य हुन सकेको छैन ?