सरकारले दिएको चेतावनीको समय सकिँदा पनि बन्द भएनन् सामाजिक सञ्जाल

काठमाडौं । सरकारले सामाजिक सञ्जाल सूचीकरण नभए बन्द गर्ने चेतावनीसहित दिएको अन्तिम समय बुधबार राति सकिँदा पनि नेपालमा सामाजिक सञ्जाल निर्वाध रूपमा चलिरहेका छन्।

गत बिहीबार मन्त्रिपरिषद्को निर्णयअनुसार सात दिनभित्र सूचीकरणमा आउन सूचना दिइए पनि फेसबुक, इन्स्टाग्राम, ट्विटर (एक्स), लिङ्क्डइन, युट्युब, गुगल र जीमेललगायत कुनै पनि सञ्चालक कम्पनीले नेपालमा सूचीकरणका लागि निवेदन दिएका छैनन्।

यसबीच बुधबार दिनभर सामाजिक सञ्जाल प्रयोगकर्तामध्ये धेरैले “अन्तिम दिन, फेसबुक बन्द हुन सक्छ” भन्दै पोस्ट गरेका थिए। तर, राति १२ बजेसम्म पनि सञ्जाल बन्द भएनन्।

सञ्चार मन्त्रालयका स्रोतका अनुसार सरकारले एकैपटक पूरै बन्द गर्ने निर्णय नगरी ‘पार्सियल सटडाउन’ को तयारी गरेको छ। यसको अर्थ—पहिलो चरणमा च्याटिङ र भिडियो कल रोक्ने, त्यसपछि चरणबद्ध रूपमा अन्य सेवाहरू सीमित गर्दै लैजाने नीति लिइनेछ।

नेपाल दूरसञ्चार प्राधिकरण (NTA) का एक अधिकारीका अनुसार, “अल्टिमेटम दिइए पनि कुनै कम्पनीले हालसम्म सूचीकरणका लागि सम्पर्क गरेको छैन। तर, सञ्जाल बन्द गर्ने विषयमा सरकारले अझै टुंगोमा पुगेको छैन।”

यता, कुन–कुन सञ्जाल बन्द गर्ने भन्नेबारे पनि सरकार अलमलमै रहेको देखिन्छ। विशेषगरी गुगल सर्च र जीमेल को प्रयोग नगरी सम्भव नहुने भएकाले यी सेवा बन्द गर्दा सरकार आफैं पनि अप्ठ्यारोमा पर्ने अवस्था छ।