सर्लाहीका बिमल साहलाई भारतको मुम्बईमा ‘हार्मोनियम ट्युनिङ विशेषज्ञ’ पदकबाट सम्मानित

काठमाण्डौ २४ बैशाख । नेपालको सर्लाही जिल्ला, ईश्वरपुर नगरपालिका–१३ निवासी बिमल साहले संगीतको प्राविधिक क्षेत्रमा उल्लेखनीय अन्तर्राष्ट्रिय सफलता हासिल गर्दै देशको गौरव बढाउनुभएको छ। भारतको सांगीतिक सहर मुम्बईमा आयोजित एक विशेष समारोहमा उहाँलाई ‘हार्मोनियम ट्युनिङ विशेषज्ञ’ पदक प्रदान गरिएको हो।

साहलाई हार्मोनियमको ट्युनिङमा देखाउनुभएको असाधारण दक्षता र विशेषज्ञताका आधारमा ‘कुमारको स्वर्ण पदक’ (Kumar’s Gold Medal) बाट सम्मानित गरिएको आयोजकले जनाएको छ। मुम्बई जस्तो प्रतिस्पर्धी र प्रतिष्ठित सांगीतिक केन्द्रमा पुगेर नेपाली प्राविधिक कलाकारले यस्तो उच्च सम्मान प्राप्त गर्नु महत्वपूर्ण उपलब्धिका रूपमा हेरिएको छ।

सर्लाहीको सामान्य परिवेशबाट सुरु भएको उनको सांगीतिक यात्रा आज अन्तर्राष्ट्रिय स्तरसम्म पुगेको छ। हार्मोनियमको सूक्ष्म सुर–ताल मिलाउने जटिल विधामा उनले हासिल गर्नुभएको दक्षताले नेपाली संगीत क्षेत्रका लागि नयाँ सम्भावना र प्रेरणा थपेको छ।

यस उपलब्धिले मधेस प्रदेशसहित समग्र नेपाली कला–संगीत क्षेत्रको पहिचानलाई अन्तर्राष्ट्रिय मञ्चमा स्थापित गर्न महत्वपूर्ण योगदान पुर्‍याएको विश्वास गरिएको छ।