रसुवाको भोटेकोशी बाढी पीडितका लागि एटलान्टाबाट सी.के. पराजुलीद्वारा १ लाख रुपैयाँ सहयोगको घोषणा

काठमाण्डौ, ११ भाद्र । रसुवाको भोटेकोशी बाढी पीडितका लागि एटलान्टाबाट सी.के. पराजुलीद्वारा १ लाख रुपैयाँ सहयोगको घोषणा एटलान्टा, अमेरिका – चीनको तिब्बत क्षेत्रमा आएको भूकम्प र हिमपहिरोका कारण रसुवाको भोटेकोशी नदीमा आएको भीषण बाढीले टिमुरे, स्याफ्रुबेँसी लगायतका क्षेत्रमा अकल्पनीय र अपूरणीय क्षति पुर्‍याएको छ।

कैयौँले ज्यान गुमाएका छन्, सयौँ बेपत्ता छन् र बस्तीहरू बगेका छन्। प्राकृतिक विपत्तिको यो क्रूर प्रहारले सिङ्गो देश शोकमग्न छ।मातृभूमि रोइरहेको यो संकटको घडीमा पीडितहरूको तत्काल उद्धार, राहत तथा सहयोगका लागि अमेरिकाको एटलान्टामा बसोबास गर्दै आउनुभएका श्री सी.के. पराजुली (CK Parajuli) ले रु. १,००,०००/- (अक्षरेपी एक लाख रुपैयाँ) आर्थिक सहयोग गर्ने घोषणा गर्नुभएको छ।

नेपालको कास्की जिल्ला अन्तर्गत चापाको निरबाने स्थायी घर भई हाल अमेरिकाको एटलान्टामा रहँदै आउनुभएका पराजुलीले आफ्नो मातृभूमिमा परेको यो महाविपत्तिमा सानो भए पनि मल्हम पट्टी लगाउन सकोस् भन्ने उद्देश्यले उक्त रकम सहयोग गर्ने निर्णय गर्नुभएको हो।सहयोगको घोषणा गर्दै श्री सी.के. पराजुलीले भन्नुभयो, “देश दुखिरहेका बेला प्रवासमा रहे पनि हाम्रो मन नेपालमै हुन्छ।

मातृभूमिलाई यति ठूलो संकट पर्दा हामी जहाँ भए पनि एकजुट भएर सहयोग गर्नु हाम्रो कर्तव्य हो। मेरो यो सानो सहयोगले विपतमा परेका नेपाली दाजुभाइ तथा दिदीबहिनीहरूको राहत र पुनर्स्थापनामा थोरै भए पनि मद्दत पुग्ने विश्वास लिएको छु।

“उहाँले प्रवासमा रहेका अन्य सम्पूर्ण नेपालीहरूलाई पनि आफ्नो क्षमता अनुसार मातृभूमिको यो अप्ठ्यारो परिस्थितिमा उद्धार र राहतका लागि हात बढाउन हार्दिक अपिल गर्नुभएको छ। साथै, विपतमा ज्यान गुमाउनेहरू प्रति हार्दिक श्रद्धाञ्जली व्यक्त गर्दै घाइतेहरूको शीघ्र स्वास्थ्य लाभको कामना गर्नुभएको छ।